Køyrereglane seier kva slags miljø vi vil ha på Sommarleir i Noregs Ungdomslag, og alle som er til stades under leiren har eit ansvar for å sjå til at leiren er ein fin plass for alle å vere.
Sommarleir i Noregs Ungdomslag skal vere ei trygg, inkluderande og positiv tilskiping!
Rammene for Sommarleir bygger på Noregs Ungdomslag sine fire prinsipp, og skal vere frilynt samfunnsengasjert, formidle folkeleg kultur og ha ein trygg og inkluderande samværskultur.
1. Inkludering
Alle er like velkomne på leir og som gode frilyndte menneskje skal vi sørgje for at alle blir inkludert i fellesskapet. Under leir vil det vere eit mangfald av meiningar, erfaringar, føresetnadar og kulturar. Noregs Ungdomslag ønskjer at alle skal kjenne seg møtt med forståing og positiv haldning.
2. Respekt for andre
Alle skal bli møtt med respekt. Som frilyndt er du raus, fordomsfri og viser respekt for alle menneske, uavhengig av alder, kjønn, seksuell legning, etnisk tilhøyrsel, bakgrunn, interesser, fysiske/psykiske føresetnader eller politisk ståstad. Ein skal respektere andre sine eigendelar, behov og ønskje, så framt desse ikkje er i strid med reglar, prinsipp og rammer. Noregs Ungdomslag tek avstand frå all form for diskriminering og trakassering.
3. Trygg
Alle skal kjenne seg trygge på leir og ein skal respektere kvarandre sine grenser. Leiren er ein stad for trygg, god og rusfri samværskultur. Bruk av rusmiddel, seksuell trakassering, overgrep, vald og utagerande åtferd aksepterast ikkje! Dette gjeld uavhengig av alder og på alle arenaer og rom, både før, under og etter leiren.
Viss du sjølv opplever eller er vitne til hendingar og oppførsel som strider imot våre prinsipp og køyrereglar, kontakt leirsjef eller hovudansvarleg for leir.
