Historia til Sommarleiren

…til kva me no kjenner som Sommarleiren høyrer me om i 2001 då det vart skipa til «frå halling til hiphop» i samband med landsstemnet i Asker. Dette året vart det òg sendt ut innbyding til alle ungdomsringane i landet til FLUR (Fylkeslagets ungdomsring i Aust-Agder Ungdomslag) om å kome til Lillesand i nokre dagar før landsstemnet i Asker. Ungdommane som reiste til Lillesand var mellom anna på utflukt til Dyreparken og vart godt kjende før dei skulle til Asker. Dette kom til å verte kalla «Noregs Ungdomsring», og vart så populært at det vart teke opp att året etter og kvart år fram til i dag.

Dei første åra varte ungdomssamlingane berre nokre dagar i framkant av festivalen. Då var det leir frå måndag til onsdag, og så vart det festival frå torsdag til sundag. Dei første åra var det òg berre kurs i folkedans, og målgruppa var for det meste dei etablerte ungdomsringane rundt om i landet.

Ein ting som er sikkert, er at det har vore ein del namneendringar dei siste 20 åra, og no lyt me prøve å forklare dei ulike namna og når dei vart endra.

Sidan seint på 1890-talet har Noregs Ungdomslag skipa til årlege stemner, ofte kalla landsstemne eller NU-stemne. I 2002 byta dei namn til Folkekulturfestivalen for å prøve å femne om eit større publikum enn berre NU-medlemmar. I 2010 vart dette endra til Folkedansfestivalen, noko den heitte fram til den vart nedlagt på Landsmøtet i 2015. Den siste Folkedansfestivalen gjekk av stabelen i Ørsta i 2014.

Den første ‘sommarleiren’ i 2001 hadde eigentleg ikkje noko namn, men fekk namnet Noregs Ungdomsring (NUR) i 2002. Dette vart endra til Sommarleiren i 2010.

"Sommarleiren er noko av det beste som finst. Ein sunn dose fagleg innhald, ein liten dose galskap, og mykje, mykje moro. Å få dra på leir år etter år har gitt meg utruleg mykje, av både lærdom om vener, i tillegg til at eg har fått sett heile landet vårt frå Kirkenes i nord til Lillesand i sør."

- Torbjørn Bergwitz Lauen,
vore på Sommarleiren 16 gonger

“For meg vil jeg si det beste med Sommarleiren var å bli kjent med andre med like interesser fra hele landet. I tillegg til at det er variert med at man kan prøve forskjellige kurs. Da jeg først reiste drev jeg mest med musikk, men fikk mer interesse for dans og teater, kanskje fordi jeg fikk muligheten til å leke meg med det på leir. Mange av de jeg møtte på leir er fortsatt gode venner. Faktisk var det takket være en jeg ble kjent med på Sommarleiren at jeg fant meg sted å bo da jeg begynte å studere!”

- Ingeborg Hollekim Bringslid,
vore på Sommarleiren åtte gonger